Xefe Governu enkoraja estudante tenke estuda-labele kopia husi “Google”

POLÍTIKA

Primeiru-Ministru (PM), Kay Rala Xanana Gusmão. Imajen/Mídia PM.

DILI, 02 Setembru 2025 (TATOLI) – Xefe Governu Kay Rala Xanana Gusmão enkoraza estudante timoroan sira atu estuda ho kakutak rasik nary labele kopia de’it husi google tanba ne’e sei la apriende buat ruma.

Notísia Relevante: 

“Estudante sira, imi tenke estuda, estuda, maibé husi imi-nia kakutak rasik, labele ba kopia de’it husi google, dehan ne’e imi matenek ona. Google hanesan referensia maibé barak liu mai husi imi-nia kakutak rasik,” Xefe Governu hateten bainhira sai oradór prinsipál iha semináriu nasionál ne’ebé realiza husi Prezidente Repúblika José Ramos-Horta ho tema “Papél jerasaun foun iha kontextu dezenvolvimentu nasionál hodi hatutan obra jerasaun tuan”, iha Palásiu Prezidensiál Nicolau Lobato, Bairru Pite, tersa ne’e.

Nia husu mós ba joven sira atu buka estuda situasaun hotu entre rai-li’ur nary laran atu hatene hodi ánaliza saida mak sei akontese iha agora nary ba futuru.

“Joven sira, estudante sira buka estuda situasaun hotu, halo ánaliza, hametin pás. Nu’udar joven, rai-ne’e sei iha imi nia liman, imi mak sei enfrenta difikuldade sira sei mai iha oin, labele haluha, hadomi malu-ba,” nia tatoli.

Iha okaziaun ne’e, nia husu ba joven-sira labele fahe malu tan de’it kór arte-marsiál ka kór partidu.

“Joven sira labele fahe malu tan de’it kór oioin, labele fahe malu tanba ami nia-ema sira sa’e ona Primeiru-Ministru, ami nia-ema sira sai ona Ministru ou ami nia-ema iha Parlamentu Nasionál ikus baku-malu, ne’e labele,” nia hateten.

Nia hatutan, joven sira tenke matenek iha kakutak rasik, kriativu iha parte hotu ne’ebé fó benefisiu ba-an rasik, ba ema seluk nary ba nasaun hodi kontribui ba dezenvolvimentu ne’ebé la’o hela.

Jornalista : Hortencio Sanchez

Editór         : Cancio Ximenes