S’amuser invade pozisaun AD SLB iha jornada daualu primeira divizaun LFFTL

DESPORTU, DILI, HEADLINE

Tabela klasifikasaun jornada daualu primeira divizaun LFFTL. Imajen espesiál

DILI, 17 Dezembru 2025 (TATOLI)–Ekipa futeból femininu S’amuser invade pozisaun dahuluk AD SLB iha jogu jornada daualu primeira divizaun Liga Futeból Femininu Timor-Leste (LFFTL).

S’amuser FC ne’ebé iha jornada dahitu okupa iha pozisaun daruak ho pontu 19 nary lakon produtividade golu ho AD SLB ne’ebé rekolla golu +65 konsege sa’e ba pozisaun dahuluk hafoin manán Vale de Lahane (VDL) ho skor 0-11, foin lalais ne’e iha Estádiu Munisipál Dili. Enkuantu, ekipa husi Laulara tun hikas ba pozisaun daruak ho pontu 20 hafoin impata 0-0 bainhira kontra Maudoko FC.

Notísia relevante: VDL sofre golu 0-11 husi S’amuser FC

Iha sorin seluk, Buibere FC okupa iha pozisaun datoluk ho pontu 19 bainhira gaña pontu tolu husi UNITAL FC ho skor 1-9, enkuantu UNITAL mós kontinua iha pozisaun daneen ho pontu sia (9).

Aleinde ne’e, Maudoko ne’ebé impata ho AD SLB okupa iha pozisaun dahaat iha tabela klasifikasaun ho totál pontu 14, rezultadu manán haat (4), impata rua (2), derrota rua (2) nary Maranatha iha pozisaun dalimak ho pontu 14 mezmu iha jogu kontra Akadémika FC manán ho skor 0-7.

Akadémika FC ne’ebé foin rekolla pontu sia (9) okupa iha pozisaun dahitu hafoin to’o volta daualu manán tolu (3) nary derrota jogu lima (5), enkuantu Na’in-Feto FC sees husi zona mean sa’e bá pozisaun daualu ho pontu haat (4) hafoin iha jogu kontra Kulugisa FC manán ho skor 4-1.

VDL FC okupa iha pozisaun dasiak ho pontu haat (4), rezultadu manán ida (1), impata ida (1) nary derrota neen (6), enkuantu Kulugisa FC sofre ona derrota iha jogu ualu (8) nary kontinua okupa iha pozisaun ikus iha tabela klasifikasaun LFFTL.

Jornalista: Natalino Belo 

Editór: Xisto Freitas da Piedade