SNAEM sosializa transferénsia pasiente via aero ba servisu saúde Vikeke

HEADLINE, MUNISÍPIU, SAÚDE, VIKEKE

SNAEM, I.P. sosializa transferénsia pasiente via aero ba servisu saúde Vikeke. Imajen TATOLI/Vitorino Lopes da Costa

VIKEKE, 17 Dezembru 2025 (TATOLI)–Servisu Nasionál Ambulánsia Emerjénsia Medika, Institutu Públiku (SNAEM, I.P.), Kuarta ne’e, realiza sosializasaun kona-ba transferénsia pasiente liuhusi aero nian ba servisu saúde Munisípiu Vikeke.

Iha aprezentasaun ne’e, Diretór Jerál SNAEM, Simplício Amaral de Deus, haktuir objetivu husi prezensa SNAEM atu partilla transferénsia pasiente sira liuhusi aero nian ba servisu saúde Munisípiu Vikeke hodi komprende detallu kustu orsamentu nian.

“Tanba ita halo tranferénsia pasiente liuhusi aero ne’e ho kustu ne’ebé boot, entaun ami presiza partilla informasaun sira-ne’e ba ita-nia servisu saúde Munisípiu Vikeke sira liuliu iha internamentu katak atu ita halo transferénsia moras sira-ne’ebé sedate liu mak ita foin uza via aero. Bainhira pasiente ida kondisaun ladún sedate mak ita uza aero hotu, sei prejudika ba ita-nia orsamentu. Tan ne’e, ami mai hodi tranzmite ba ita-nia profesionál saúde sira,” Simplício Amaral de Deus hateten iha Salaun Polo Vikeke Vila.

Nia esplika atu deside pasiente sira halo transferénsia pasiente, desizaun husi médiku sira tanba sira mak hatene kondisaun pasiente sira-nian.

Simplício haktuir, hahú husi Janeiru to’o Dezembru tinan ne’e, sentru internamentu Vikeke transfere pasiente liuhusi aero ne’e hamutuk ema na’in-neen.

“Tanba ne’e, ami hakarak agradese ba Servisu Saúde .unisípiu Vikeke, tanba liuhusi sira-nia esforsu mak iha tinan ida-ne’e ita halo transferénsia pasiente liuhusi aero ne’e hamutuk na’in-neen,” nia hato’o.

Nia dehan, kustu transferénsia via aero ba tinan 2025 mak hanesan Ataúru $360,  Baukau $770,   Lautein $1.020,  Vikeke  $810, Kovalima  $760, Same $610, Bobonaru $520 nary RAEOA $1.020. Ba tinan 2026, kustu husi Ataúru $410,  Baukau $880,   Lautein $1.170,  Vikeke  $930,  Kovalima  $870,  Same $700,  Bobonaru $600 nary RAEOA $1.170.

Tuir dadus, pasiente sira-ne’ebé halo transferénsia liuhusi aero iha tinan 2025  mak hanesan Munisípiu Ataúru hamutuk na’in-106, Baukau na’in-neen (6), Lautein na’in-siai (9), Vikeke na’in-neen (6), Kovalima na’in-26, Same na’in-11, Bobonaru Na’in-61 nary RAEOA na’in-36.

Entretantu, partisipa iha diseminasaun transferénsia pasiente emerjénsia liuhusi aero ne’e husi médiku sira, infermeira, parteira, ekipa SNAEM Vikeke nary nasionál.

Jornalista: Vitorino Lopes da Costa

Editór: Xisto Freitas da Piedade