EUTL husu PNTL fasilita diálogu ho Tribunál Rekursu 

HEADLINE, SEGURANSA

Reprezantante portavós EUTL, Natalício Nunes. Foto/Nelson de Sousa

DILI, 17 Dezembru 2025 (TATOLI)–Portavóz Estudante Universitáriu Timor-Leste (EUTL), Natalício Nunes informa karik parte seguransa la autoriza sira atu hala’o marsa populár, sira husu Polísia Nasionál Timor-Leste (PNTL) atu fasilita sira hodi halo diálogu ho Prezidente Tribunál Rekursu.

“PNTL la autoriza ita la’o tuir rute ne’ebé mak ita husu ona ba PNTL. Maibé, pozisaun EUTL mak bainhira sira la autoriza ita atu vizita tribunál, sira tenke fasilita ita atubele halo diálogu ho Tribunál Rekursu,” nia dehan ba jornalista sira iha Kampus Sentrál UNTL, Kuarta ne’e.

Nia esplika objetivu husi asaun marsa populár ne’e atu Tribunál Rekursu tenke loke diálogu ho EUTL, ligadu ho Lei Pensaun Mensál Vitalísia.

“Ita-nia pedidu hatama ona bá Tribunál Rekursu, maibé ita-nia pedidu pendente hela iha Tribunál Rekursu ne’e tan saida? Tanba ita deskonfia iha tendénsia atu Tribunál Rekursu bele deklara inkonstitusionalidade ba lei ne’e, tan-ne’e ita ita husu Tribunál Rekursu atu loke diálogu ho EUTL,” Natalicio haktuir.

Notísia relevante: Konstitusionalidade Lei Pensaun Mensál Vitalisia ne’e Tribunál mak deside

Nia hatutan EUTL sei ba hasoru PNTL, atu husu PNTL bele fasilita EUTL hodi ba diálogu ho Tribunál Rekursu. Aleinde ne’e, estudante sira mós husu Parlamentu Nasionál labele nonook, tenke ezije mós Tribunál Rekursu atu deklara inkostitusionalidade ba lei referida.

Tuir portavóz ne’e, loloos lei referida la to’o iha Tribunál Rekursu, maibé tanba benefisiáriu sira submete pedidu fiskalizasaun abstrata bá iha Tribunál Rekursu liuhusi Provedoria Direitu Umanu nary Justisa (PDHJ-sigla portugeza).

“Informasaun ne’ebé ita hetan, normál kazu sira hanesan ne’e juís primeira klase sira hanesan señór Deolindo, señora Natércia ho Duarte Tilman mak sempre kaer prosesu sira-ne’e, entaun ita husu sira na’in-tolu atu bele deklara tuir ezijénsia povu nian,” Nunes realsa.

Portavóz ne’e deklara katak sira sei organiza fali masa populár hodi halo asaun hasoru Tribunál Rekursu.

Entretantu, hafoin portavóz EUTL na’in-haat to’o iha Komandu Polísia Munisípiu Dili, Komandante Polísia Munisípiu Dili laiha fatin, tan-ne’e Segundu Komandante Unidade Espesiál Polísia, Silveiro de Araújo, husu portavóz na’in haat atu aban dadeer mak bele hasoru komandante referidu.

“Ha’u husu imi na’in-lima, aban dadeer imi-na’in lima ne’e mak mai iha Komandu Jerál, depoiz hasoru Komandante Operasaun, hodibele lori imi bá hasoru Komandante Jerál hodi koordena malu,” nia esplika.

Segundu Komandante ne’e enkoraja estudante sira atu organiza malu ho didi’ak, nune’e asaun ne’e bele la’o ho susesu.

Jornalista: Osória Marques

Editór: Xisto Freitas da Piedade