.png)
6 months ago
6
DILI, 29 Agostu 2025 (TATOLI)–Primeiru-Ministru (PM), Kay Rala Xanana Gusmão, sesta ne’e, informa ba Xefe Estadu José Ramos-Horta katak iha tinan oin sei la’o haleu territóriu Timor-Leste iha kada munisípiu hodi haree kona-ba prosesu desentralizasaun podér lokál.
“Ha’u informa ba Prezidente, tinan oin mai ne’e ha’u sei la’o haleu Timor hodi haree kona-ba desentralizasaun administrative nary podér lokál,” Xanana hateten ba jornalista sira hafoin termina reuniaun ho Xefe Estadu iha Palásiu Prezidensiál Nicolau Lobato, Bairru Pite.
Afirmasaun ne’e, Xefe Governu hato’o dezde fevereiru liu-ba atu vizita kada munisípiu iha fulan-Marsu liu-ba maibé la konsege tanba okupadu ho servisu esensiál sira.
Ho nune’e, iha tinan oin, Xefe Governu planeia ona sei la’o sai tama munisípiu ida-idak hodi haree nary observa kona-ba oinsá atu estabelese desentralizasaun podér lokál kada munisípiu hotu.
“Oekusi nian fulan hirak liu-ba hasai ona rezolusaun sei hapara, entaun kuarta foin lalais iha Konsellu Ministru deside hapara Rogerio Lobato ho João Gonçalves nia mandate. Governu agradese tebes ba sira ba kontribuisaun ne’ebé sira halo, maibé Atoni-oan sira dalaruma ko’alia ho ha’u dehan kada munisípiu hotu hili nia ema rasik, mais ami mak la’e, entaun iha ne’ebá Konsellu Ministru aprova kedan rezolusaun ida nomea estrutura foun ida provizóriu ba fulan tolu (3),” nia dehan.
Nune’e, Governu sentrál sei kontrola nafatin estrutura provizóriu ne’e, bainhira halo servisu di’ak tuir Oekusi-oan sira nia hakarak mak sei kontinua, karik lae mak sei hapara.
“Ida-ne’e to’o 31 dezembru atu sira hatudu duni sira iha kbiit atu dezenvolve povu Atoni ka lae, sira bele fiar ba sira nia oan sira ka lae. Tuir ha’u munisípiu hotu, fó ba sira-nia oan mak kaer, tanba saida labele, ne’ebé Prezidente Repúblika mós aseita, kontinua nafatin-ba liuliu Oekusi tenke lori ba oin,” nia dehan.
Jornalista : Hortencio Sanchez
Editór : Cancio Ximenes
/data/photo/2025/08/25/68abe52811277.jpeg)
