VDL FC impata 4-4 ho Na’in-Feto

DESPORTU, HEADLINE

VDL FC Vs Na'in-Feto iha Estádiu Munisipál Dili. Imajen TATOLI/ Natalino Belo

DILI, 19 Setembru 2025 (TATOLI)—Kompetisaun faze apuramentu volta daruak Liga Futeból Feminina Timor-Leste (LFFTL) rezulta ekipa VDL FC impata 4-4 ho Na’in-Feto.

Jogu ne’ebé realiza iha Estádiu Munisipál Dili, iha primeira parte ekipa VDL FC lidera uluk ho skor 1-3 bainhira jogadora Marilia Xavier (6) enxe golu rua iha minutu 17 nary 19 enkuantu golu seluk hatama husi jogadora Garcia (9) iha minutu 11.

Enkuantu, ekipa Na’in-Feto FC rasik konsege halo atake hodi rezulta golu ida iha minutu 22 husi jogadora Siminia (33) nune’e primeira parte VDL lidera ho skor 1-3.

Iha jogu parte daruak, ekipa Na’in-Feto inisia halo atake ba área defeza VDL hodi rezulta golu rua husi jogadora Ester Bareto (14) iha minutu 46 nary 50, maski nune’e VDL konsege lidera hikas golu iha minutu 66 liuhosi jogadora Garcia Tallo (9) hafoin jogadora Na’in-Feto FC Luzia Tilan (4) hetan kartaun mean iha minutu 57.

Notísia relevante: VDL FC lidera tabela klasifikasaun hafoin halakon São José 7-0

Maski menus jogadora, ekipa Na’in-Feto la lakon espíritu hodi kontinua atake nune’e iha minutu-80 konsege halo tabela skor impata 4-4 hafoin jogadora Barreto (14) enxe tan golu ho hattrick nary ekipa rua obrigadu tenke fahe pontu hanesan ba malu.

Antes ne’e, ekipa rua kontra malu iha volta dahuluk rezulta jogu ikus impata 2-2 iha abertura faze apuramentu LFFTL ne’ebé realiza iha loron-Sábadu, 13 Setembru iha Estádiu Munisipál Dili.

Husi jogu entre ekipa rua, rezulta VDL FC kontinua lidera tabela klasifikasaun ho pontu lima(5), rezultadu husi manán ida (1), impata rua (2) ho produtividade golu 13, enkuantu Na’in-Feto FC rekolla pontu lima (5) maibé tenke okupa pozisaun daruak bazeia ba produtividade golu sia (9) nary ekipa São José iha zona mean ho pontu 0, rezultadu husi jogu rua ne’ebé rezulta lakon hotu.

Jornalista: Natalino Belo 

Editór: Xisto Freitas da Piedade