Suku Uabubu seidauk iha postu saúde

MUNISÍPIU, SAÚDE, VIKEKE

Xefe Suku Uabubu, Postu Administrativu Ossú, Munisípiu Vikeke, Joanico M. A. da Cruz. Imajen TATOLI/ Vitorino Lopez da Costa

VIKEKE, 04 Setembru  2025 (TATOLI)—Xefe Suku Uabubu, Postu Administrativu Ossú, Munisípiu Vikeke, Joanico M. A. da Cruz informa tinan sanulu-resin Suku Uabubu seidauk iha postu saúde própriu hodi atende komunidade.

“Ami-nia postu saúde to’o agora Governu seidauk estabelese. Kuaze tinan sanulu-resin ona komunidade oferese sira-nia uma privadu hodi fó atendimentu ba ita-nia komunidade ne’ebé moras,” Joanico ba TATOLI iha Postu Ossú, Kinta ne’e.

Notísia relevante: https://tatoli.tl/2025/04/15/autoridade-uabubu-husu-governu-konstrui-postu-saude/

Autoridade ne’e haktuir uma ne’ebé daudaun ne’e pesoál saúde uza ba atendimentu komunidade oferese  gratuita tanba postu saúde laiha.

“Maibé, ita kompara hanesan iha Dili karik, parte ministériu aluga kada fulan selu ba uma na’in sira. Tanba de’it fatin laiha ita-nia komunidade oferese sira-nia uma sai hanesan postu saúde kuaze tinan sanulu-resin ona,” nia haktuir.

Joanico dehan preokupasaun ba  postu saúde ne’e sira hato’o beibeik ba ministériu relevante maibé seidauk iha resposta.

Tuir dadus, Suku Uabubu iha populasaun hamutuk 2.717, uma-kain hamutuk 578, ne‘ebé kompostu husi Aldeia Buanurak, Osogori, Lekibuti, Uailia nary Letame.

Jornalista: Vitorino Lopez da Costa

Editór: Xisto Freitas da Piedade