SSM Vikeke simu ona vasina kontra raiva 50 viál

SAÚDE, VIKEKE

Diretór Servisu Saúde Munisípiu (SSM) Vikeke, Aljaksono Soares Maia. Imajen TATOLI/Vitorino Lopez da Costa

VIKEKE, 16 Outubru 2025 (TATOLI)—Diretór Servisu Saúde Munisípiu (SSM) Vikeke, Aljaksono S. Maia, informa SSM Vikeke simu ona vasina kontra vírus raiva hamutuk 50 viál hodi fó vasinasaun ba komunidade nia asu.

“Kona-ba moras raiva horisehik ita simu ai-moruk vasinasaun asu liuliu ba vírus raiva nian hamutuuk 50 viál,” Aljaksono ba Tatoli iha Postu Vikeke Vila, Kinta ne’e.

Nia esplika Servisu Agrikultura liuhusi Diresaun Veterinária sira mak sei vasina asu sira.

“Ha’u husu Diresaun Veterinária Vikeke hakbesik aan ba Servisu Saúde Vikeke hodi foti ai-moruk vasina nune’e iha tempu badak ita bele hahú vasina asu sira para halo prevensaun ba vírus raiva,” Aljaksono hato’o.

Notísia relevante: Janeiru-Setembru, asu tata ema na’in-58 la indika raiva

Nia haktuir iha Munisípiu Vikeke rejista asu tata hamutuk na’in-72, maibé rezultadu teste hatudu seidauk pozitivu ba raiva.

“Ida-ne’e ita hatudu katak ita-nia vijilánsia di’ak. Daudaun ne’e ita halo diseminasaun vírus raiva nian ba ita-nia populasaun iha postu lima, ne’ebé parte veterinária kontinua halo vasinasaun,” nia tenik.

Jornalista: Vitorino Lopes da Costa

Editór: Xisto Freitas da Piedade