Autoridade lokál Vikeke solisita Governu instala liña internet iha sede suku sira

HEADLINE, MUNISÍPIU, VIKEKE

Autoridade lokál Vikeke hirak-ne'e husu Governu instala liña net ba sede suku sira iha Vikeke. Imajen TATOLI/Vitorino Lopes da Costa

VIKEKE, 17 Dezembru 2025 (TATOLI)—Xefe Suku Makadike de Baixo, Postu Administrativu Uatulari, Munisípiu Vikeke, Martinho Soares Gusmão, solisita Governu liuhusi Ministériu Administrasaun Estatál (MAE) instala liña net ba sede suku sira iha Munisípiu Vikeke.

“Durante ne’e ami hasoru liu dezafiu ba liña internet. Ami atu hatama dadus ruma ba iha sistema labele tanba ami laiha liña internet. Tan ne’e mak ha’u hakarak husu ba Governu se bele instala rede net ba kada suku, atubele fasilita ofisiál suku sira hatama dadus ba sistema,” Martinho Soares Gusmão hateten ba TATOLI iha resintu Munisípiu Vikeke, Kuarta ne’e.

Martinho haktuir durante suku sira enfrenta liña net ba atualiza dadus, autoridade sira esforsu uza pulsa Telemor, Timor Telekom ba ativasaun internet, maibé rede la’o ladi’ak.

Aleinde ne’e, nia relata, kana-ba fasilidade hanesan komputadór Governu  apoia ona hodi fasilita servisu, falta mak rede net atu atualiza dadus ba sistema.

Hatán ba preokupasaun ne’e, reprezentante Ministru Administrasaun Estatál (MAE),  Amandio Paulino Gastão bash Rosário de Sousa, tenik, kona-ba preokupasaun rede net daudaun ne’e DNIK hahú instala liña net ba uluk postu administrativu sira, suku seidauk.

“Kona-ba preokupasaun liña net ba suku sira ita seidauk estabelese. Agora ita instala uluk liña net ba edifísiu postu sira iha Vikeke. Ba suku sira ita sei realiza  iha tinan 2026,” nia informa.

Entretantu, Munisípiu Vikeke iha suku hamutuk  38, iha-ne’ebé postu administrativu Ossú iha suku sanulu (10), Vikeke Vila suku sanulu (10), Lakluta suku haat (4), Uatulari suku ualu (8) nary Uatukarbau suku neen (6).

Jornalista: Vitorino Lopes da Costa

Editór: Xisto Freitas da Piedade