SEKOMS-Embaixadora Portugál diskute kona-ba formasaun ba jornalista sira

POLÍTIKA

Sekretáriu Estadu Komunikasaun Sosiál, Expedito Dias Ximenes, nary Embaixadora Portugál iha Timor-Leste, Manuela Bairos. Imajen TATOLI/Alexandra da Costa.

DILI, 01 SETEMBRU 2025 (TATOLI)—Embaixadora Portugál iha Timor-Leste, Manuela Bairos, segunda ne’e, hasoru malu ho Sekretáriu Estadu Komunikasaun Sosiál, Expedito Dias Ximenes hodi diskute kona-ba formasaun jornalizmu nian ba jornalista timoroan sira.

Notísia Relevante: CLJ eleva jornalista nia kapasidade liuhosi formasaun língua portugeza

Vizita ne’e hanesan despedida ikus durante tinan tolu (3) ho balun nia laran halo nia mandatu iha Timor-Leste hanesan embaixadora.

Sekretáriu Estadu Komunikasaun Sosiál, Expedito Dias Ximenes, hateten ohin embaixadora Portugál ba Timor-Leste, Manuela Bairos mai halo vizita despedida tinan tolu ho balun sai embaixadora Portugál iha Timor-Leste.

“Molok nia mai hasoru ha’u, nia mós ba hasoru uluk Primeiru-Ministru, nune’e iha enkontru ida-ne’e ami ko’alia liu kona-ba programa formasaun ba jornalista sira,” Sekretáriu Estadu ne’e informa ba jornalista sira iha Gabinete SEKOMS, Palásiu Governu, ohin.

Programa formasaun ba jornalista sira-ne’e hala’o durante tinan barak nia laran ho Institutu Camões Portugál liuhusi Konsultóriu Lian Portugeza (CLJ, sigla portugés) nune’e servisu hamutuk sei kontinua faze datoluk iha tinan 2026, tanba mídia komunikasaun sosiál papél importante iha dezenvolvimentu nasionál.

“Jornalista portugeza sira-ne’ebé envolve durante iha ita-nia prosesu luta libertasaun nafatin apoiu liuhusi servisu hamutuk ho jornalista timoroan sira,” nia dehan.

Nia hateten, maske embaixadora nia mandatu remata ona maibé nia husu nafatin ba Governu Portugál atu kooperasaun ne’ebé durante ne’e la’o iha área komunikasaun sosiál atu kontinua nafatin,

“Lori Governu Timor nia naran, ha’u hato’o gradesementu ba servisu durante ne’e,” nia hateten.

Iha biban ne’e, Embaixadora Portugál iha Timor-Leste, Manuela Bairos hato’o agradesementu ba kolaborasaun durante ne’e ho Sekretáriu Estadu Komunikasaun Sosiál liuhusi projetu Konsultóriu Lian Portugeza, ne’e sei iha oportunidade atu kontinua formasaun ne’e iha tinan oin mai.

“Jornalista Portugeza mós apoiu partikularmente ba car determinasaun Timor-Leste nia iha luta libertasaun nasionálm” nia dehan.

Maske Portugál hansan frente diplomátika maibé iha kolaborasaun di’ak ho ema hotu iha Timor liuliu frente klandestina, frente armada ho efeitu atu pasa mensajen ba públiku.

Notísia Relevante:  CLJ entrega relatóriu estudu viabilidade servisu jornalizmu ba SEKOMS

Jornalista : Alexandra da Costa

 Editór      : Cancio Ximenes