Projetu irrigasaun Genumatan seidauk hatudu progresu

BOBONARU, HEADLINE

Projetu konstrusaun irrigasaun Genumatan, iha suku Ritabou, postu administrativu Maliana, munisípiu Bobonaru. Foto/Mídia Suku Ritabou

BOBONARU, 05 Setembru 2025 (TATOLI) – Eis-Koordenadór Autoridade Munisípiu Bobonaru, Celestino Marques, preukupa ho implementasaun projetu konstrusaun irrigasaun Genumatan, iha suku Ritabou, postu administrativu Maliana, tanba la hatudu progresu ne’ebé di’ak.

Governu lokál konstrui irrigasaun ne’e atu fornese bee ba to’os nary natar hamutuk ektare 80 hodi tulun agrikultór sira hasa’e produsaun agríkola, nune’e bele responde ba nesesidade domestíka munisípiu Bobonaru nian.

“Projetu ne’e lansa, ninia progresu mak sei ki’ik loos, foin atinje 24,87%. Tékniku sira husi PDIM tenke bolu kompañia atu ko’alia ho nia projetu tenke la’o tuir durasaun kontratu, tanba ita la reapropria orsamentu ne’e iha 2026. Tanba ne’e, sira tenke aselera projetu ne’e tuir kontratu ho autoridade munisipál Bobonaru”, nia informa iha salaun Maria Tapó foin lalais ne’e.

Xefe suku Ritabou, Maximiano dos Santos Araújo, haktuir katak nia parte horisehik (04/09/2025) observa projetu ne’e maibé serbisu paradu hela. Nia nota katak obra ne’e la’o atraza tanba serbisu barak seidauk finaliza.

“Iha kanu laran mós sei tomak, foin sira cor kala semana ida liubá, más seidauk hotu. Depois, husi kanu mai tan sorin pur volta metru 72 seidauk hotu, kanu irrigasaun nia metru 196 seidauk hada hotu. Agora, badaen sira laiha hotu, hela de’it ida ho nia membru na’in-ru’a, tanba tuir informasaun, durante fulan rua sira seidauk simu sira-nia direitu”, nia adianta.

Líder komunitária ne’e husu ba empreza implementadora atu aselera projetu referidu, tanba kalendáriu implementasaun besik finaliza ona.

“Se projetu ne’e la remata, ita sei hato’o ba Prezidente Autoridade ho tékniku sira oinsá bele hare hamutuk kompañia nia serbisu”.

Iha sorin seluk, enjeñeiru husi empreza Bia Basan Mogen Unip Lda, Onívio Gonçalves, rejeita ho informasaun katak projetu lala’o, maibé serbisu iha terrenu la’o hanesan normál.

Nia deklara obra ne’e la’o atraza tanba de’it kondisaun estrada ne’ebé difikulta tebes empreza halo mobilizasaun materiál bá fatin projetu.

“Ninia lokasi ne’e mak difikulta ita mobiliza rai-henek ho kerikil tama, tanba karreta labele asesu bá laran. Ita tau uitoan-uitoan para sira halo serbisu, más ida-ne’e iha metru 70 de’it, agora metru 10 mak hotu ona. Depois nia kanu ne’e iha metru 900 liu mak hada hotu ona, hela de’it metru 400-resin mak ita atu finaliza antes 31 Setembru nia progresu ita bele hatete ba to’o 80%”, nia garante.

“Hahú segunda agora ita aselera grupu 8 ne’e tenke tama filafali ona. Agora, grupu 4 mak la’o tanba balun sei bá halo kultura nia”, nia esplika.

Obra ne’e konstrui ho orsamentu PDIM tinan 2025 ho montante 229.429,35 ne’ebé responsabliza husi empreza Bia Basan Mogen Unipesoál Lda ho durasaun kontratu fulan haat, hahú husi 23Aabríl nary remata iha loron 30 fulan-setembru 2025.

Notisía Relevante: PAM Bobonaro husu empreza HK-BMS ezekuta projetu estrada Maliana ho kualidade

Jornalista: Sérgio da Cruz

Editora: Maria Auxiliadora