“Problema iha fronteira Oekusi, ha’u hakerek ona karta ba Prabowo”

INTERNASIONÁL

Primeiru-Ministru, Kay Rala Xanana Gusmão. Imajen Tatoli/Francisco Sony

DILI, 29 Agostu 2025 (TATOLI)–Primeiru-Ministru (PM), Kay Rala Xanana Gusmão hateten problema ne’ebé akontese iha Fronteira Oekusi entre sidadaun Timor-Leste ho Indonézia iha Imbate ne’e, nia rasik hakerek ona karta ba Prezidente Indonézia Prabowo Subianto hodi buka solusaun.

“Ha’u informa mós ba Prezidente kona-ba problema ne’ebé akontese iha Oekusi. Ha’u hakerek ona surat ida ba Prezidente Indonézia Prabowo, hakerek mós surat ba Embaixadór Indonézia nian iha ne’e atu buka took solusaun,” Xanana hateten ba jornalista sira iha Palásiu Prezidensiál Nicolau Lobato, Bairru Pite, sesta ne’e.

Xanana dehan, lider nasaun rua tenke haree hamutuk tanba problema ne’e sidadaun nasaun rua sempre fó sala ba malu, ho nune’e tenke haree loloos prpblema nia motivu hodi buka solusaun.

“Ita-nian sira temi katak sira mak halo, sira-nian temi mós ita mak halo, entaun ita tenke halo misaun konjunta ida hodi investiga didi’ak, labele akontese tan,” nia dehan.

Entretantu, problema entre sidadaun Timor-Leste ho Indonézia ne’e akontese iha loron 25 fulan-agostu liu-ba iha fronteira Quibiselo, Suku Bobometo, Sub-Rejiaun Oésilu.

Husi akontesimentu ne’e, rezulta Polísia Nasionál Timor-Leste (PNTL) Unidade Patroliamentu Fronteira (UPF) na’in-tolu (3) kanek nary funsionáriu Timor-Leste nian ida hetan taa.

Problema ne’e akontese bainhira Autoridade Timor-Leste hamutuk ho Autoridade Indonézia liuliu ekipa fronteira atu tau estakasaun iha liña fronteira Sa’apan Indonézia nary Huaknutu Timor-Leste besik Postu UPF.

Jornalista : Hortencio Sanchez

Editór        : Cancio Ximenes