PNTL Baucau rejista ona kazu hamate Sebastião Belo ba Ministériu Públiku

DILI, 01 Setembru 2025 (TATOLI ) – Komandu Polísia Nasionál Timor-Leste (PNTL) munisípiu Baukau relata ona kazu omisídiu (subriñu oho tiu) ne’ebé akontese iha aldeia Lutumutu, Vila Nova, postu administrativu Baukau vila, munisípiu Baukau ba Ministériu Públiku (MP).

Kazu omisídiu referida akontese iha loron-sábadu, 30 agostu purvolta tuku 09:00 dadeer, ne’ebé komete husi suspeitu na’in-rua ho insiál JP nary RP ne’ebé rezulta vítima Sebastião Belo lakon vida hafoin hetan kanek iha fuan, deskonfia kauza husi problema uma-laran nune’e antes akontese sona malu mosu agresaun fízika entre vítima nary suspeitu na’in-rua hodi rezulta vítima lakon vida nary suspeitu JB kanek iha parte kabun.

“Faze investigasaun la’o tiha ona tanba ita rejistu tiha ona númeru iha Ministériu Públiku, hein de’it bolu halo julgamentu,” Komandante PNTL Baukau, Superintendente João Sancho Pires,  hateten iha ninia kna’ar fatin Vila Nova, segunda ne’e.

Superintendenti Pires relata, maske família halo esforsu hodi transporta JP nary vítima ba Ospitál Rejionál Eduardo Ximenes (HoREX, sigla portugés) Baukau hodi halo tratamentu, maibé Sebastião Belo hakotu iis tanba sofre kanek todan nary suspeitu JP kontinua baixa hodi hetan atendimentu hafoin kanek iha parte kabun.

PNTL Baukau rejista kazu ne’e ba Ministériu Públiku ho numéru Nuc.067 hamutuk ho evidénsia hanesan ekipamentu arma branka hanesan tudik modo rua (2), tudik sankur ida (1) nary diman ida (1).

“Informasaun ne’ebé  tama katak, subriñu sona hela tiu, tiu mós dehan sona subriñu, maibé orsida ita haree nia prosesu investigasaun mak hakle’an liu,” Superintendente Pires akresenta.

PNTL rasik asegura ona suspeitu RP iha sela detensaun Komandu Baukau, enkuantu suspeitu JP sei iha kontinua halo tratamentu iha HoREX hodi hein prosesu iha Tribunál Distritál Baukau (TDB).

Entretantu, vítima Sebastião Belo rejista nu’udar sidadaun husi suku Lakuliu, postu administrativu Kelikai, ninia isin-mate rasik transporta ona ba Baukau ohin hafoin finaliza halo autópsia iha Ospitál Nasionál Guido Valadares (HNGV, sigla portugés), Dili.

Jornalista : Natalino Belo 

Editór : Evaristo Soares Martins