PN sei diskute atu foti karreta ne’ebé eis-deputadu sira seidauk entrega

HEADLINE, POLÍTIKA

Vise-Prezidente Parlamentu Nasionál, Alexandrino Afonso Nunes. Imajen/TATOLI

DILI, 03 Setembru 2025 (TATOLI) – Prezidente Interinu Parlamentu Nasionál (PN) nary atuál Segundu Vise, Alexandrino Afonso Nunes, informa katak Konsellu Administrasaun sei realiza enkontru, iha semana oin, hodi diskute kona-ba devolusun veíkulu antigu ne’ebé utiliza husi deputadu sira iha lejislatura anteriór, ne’ebé seidauk entrega fali.

Nia la esplika detallu kona-ba desizaun husi tribunál ne’ebé iha ona atu eis-deputadu sira entrega hikas karreta, tanba sei hein rezultadu reuniaun husi Konsellu Administrasaun.

Vise-Prezidente PN ne’e husu ba eis-deputadu sira atu devolve karreta, tanba patrimóniu Estadu nian.

“Prosesu ne’e agora la’o hela. Ohin, ha’u rona informasaun husi sekretáriu-jerál katak, Presidente [Parlamentu] fila sei halo enkontru hodi haree ida-ne’e, tanba desizaun iha tiha ona”, nia hateten iha Parlamentu, ohin.

Deputadu husi Partidu Demokrátiku (PD) ne’e la lembra karreta hira mak seidauk entrega. “Husi eis [deputadu] PD na’in-haat. Ami rona ona hanesan ne’e, fó ona lampu kuning ba ami nia eis [deputadu] prepara ba”, dehan.

Relembra katak, iha 12 Marsu 2025, Prezidente Parlamentu Nasionál, Maria Fernanda Lay, husu tribunál hodi deside karreta sira ne’ebé antigu deputadu hamutuk 35 utiliza iha lejislatura liubá.

Notísiarelevante: https://tatoli.tl/2025/03/12/ppn-husu-tribunal-deside-karreta-neebe-antigu-deputadu-35-utiliza/

Jornalista: Nelson de Sousa

Editora: Maria Auxiliadora