Na’in-Feto FC fahe pontu ho VDL iha abertura apuramentu LFFTL

DESPORTU, HEADLINE

Tabela skor. Imajen/Espesiál.

DILI, 13 Setembru 2025 (TATOLI)—Ekipa Futeból Na’in-Feto FC fahe pontu ho VDL FC hafoin ekipa rua empata 2-2 iha jogu abertura faze apuramentu Liga Futeból Femeninu Timor-Leste (LFFTL).

Iha primeira parte, bainhira árbitru huu arbitu lian mo jogu hahú, ekipa rua hala’o jogu ho rítmu ne’ebé hanesan mezmu to’o arbitu lian ikus nian ne’e, rezultadu tabela skor ekipa Na’in-Feto lidera skor 2-1.

Iha jogu referida, ekipa Na’in-Feto rasik halo kedas inisiativa atake ba área grandiár VDL FC nian, nune’e rezulta Golu rua husi Na’in-Feto ne’ebé prodús liuhosi jogadór Rivania (17) iha minitu-3 nary Mizia (9) iha minitu-7, enkuantu jogadór Garcia Talok husi VDL (9) konsege hamihis skor 2-1 iha minitu-15.

Hafoin intervalu, jogu segundu parte kontinua ekipa VDL FC hahú kedas hasa’e rítmu hodi atake bainhira aproveita mudansa estratéjia husi ekipa Na’in-Feto ne’ebé defensiva.

Husi atake ne’ebé halo, lori rezultadu mudansa tabela skor 2-2 hafoin jogadór husi VDL FC Ricardina (11) ense golu iha minitu-55 nune’e halo ekipa rua fahé pontu ba malu iha jogu dahuluk apuramentu LFFTL.

Hafoin ramata jogu, Treinadór Na’in-Feto FC, Bernardino Soares, hateten simu rezultadu jogu referida mesmu iha primeiru volta lidera maibé tanba kondisaun jogadór ne’ebé lakon iis entaun rezultadu ikus empata 2-2.

“Ami sei hakaas aan liután nune’e iha oportunidade hodi hakat sai husi faze apuramentu ida-ne’e,” Bernardino Soares informa ba TATOLI iha Estádiu Munisipál Dili, sábadu ne’e.

Bernardino kompromete sei evalua jogu kontra VDL liuliu hasa’e liután jogadór sira-nia fiziku nune’e bele gaña vitória iha jogu sira tuir mai.

Entertantu, husi rezultadu jogu referida provizóriamente tabela skor klasifikasaun hatudu Na’in-Feto FC nary VDL pontu 1 husi jogu (P) 1, enkuantu ekipa São José FC 0 ne’ebé tuir oráriu sei kontra Nain-Feto FC iha loron-15 Setembru iha Kampu Lalenok.

Jornalista : Natalino Belo 

Editór        : Cancio Ximenes