MS autoriza HNGV muda unidade kuidadu paliativu ba ospitál Lahane

SAÚDE

Rahabilitasaun Antigu Ospitál, Wirahusada, Lahane atinji ona 95 %.. Imajen tatoli/António Gonçalves

DILI, 16 Outubru 2025 (TATOLI)—Ministériu Saúde autoriza Hospoitál Nasionál Guido Valadares atu muda unidade kuidadu paliativu ba Hospitál António Carvalho Lahane, atu nune’e bele minimiza Overload iha HNGV.

“Ha’u fó ona autorizasaun ba Hospitál Nasionál Guido Valadares atu muda, maibé presiza kompleta tan ekipamentu balun. Ha’u aprovadu ona, maibé depois mak ita haree. Ita hateten katak ospitál ne’e presiza tan kompleta tan sasán sira. Ha’u hanoin sei iha mudansa, maibé ekipa preparadu ona,” Élia dos Reis Amaral ba jornalista sira iha HNGV, ohin.

Nia hateten, Ministériu Saúde fó duni espasu ba Hospitál Nasionál Guido Valadares atu  muda kuidadu paliativu ba iha Lahane, nune’e bele fó espasu ba HNGV atu halo atendementu ba moras seluk.

Diretór Servisu Apoiu Diagnóstiku nary Terapeutiku iha HNGV, Vidal de Jesus Lopes, hateten atu muda unidade kuidadu paliativu ba Hospitál António Carvalho Lahane ne’e, hetan ona aprovasaun husi Ministra Saúde, nune’e semana oin hanesan ne’e  bele muda ona ba Lahane.

“Fatin iha Lahane hetan ona lampu verde husi Ministra Saúde, atu nune’e semana ida-ne’e la konsege entaun segunda semana oin ne’e ami muda ona Unidade Kuidadu paliativu ba iha Lahane,” Vidal de Jesus Lopes hateten.

Nia dehan, ba Unidade Kuidadu Paliativu sei muda tomak, depois parte husi Hospitál Nasionál Guido Valadares sei haree, nune’e fó fali espasu ba moras sira seluk.

“Depois ami sei haree, bainhira buat hotu-hotu la’o di’ak, departamentu seluk tuir tan ho rekursu umanu mós iha posibilidade sei ba hotu Lahane. Atu nune’e, fatin rekursu umanu ne’e, ami konverte fali hodi fó baixa pasiente,” nia esplika.

Nia dehan, espasu iha ospitál António Carvalho Lahane ne’e di’ak tebes nary aproveita ida-ne’e hodi transfere pasiente, depois balun iha Hospoitál Nasionál Guido Valadares konverte fali hodi simu pasiente.

Nia esplika, ba Kuidadu Paliativu sira-ne’e, Hospoitál Nasionál Guido Valadares sei konverte fali kuandu pasiente sira-ne’ebé mak labele manda ba ospitál Lahane.

Jornalista : Felicidade Ximenes

Editór       : Cancio Ximenes