KM aprova proposta apoia finanseiru ba família martír libertasaun nasionál

NASIONÁL, POLÍTIKA

Primeiru-Ministru, Kay Rala Xanana Gusmão, prezide reuniaun Konsellu Ministru, iha Palásiu Governu, kuarta (01/01). Imajen Tatoli/Francisco Sony

DILI, 01 Outobru 2025 (TATOLI)-Konsellu Ministru aprova proposta dekretu lei ida hodi fó apoiu finanseiru ba família hanesan inan-aman ka maun-alin husi martír libertasaun nasionál nian neʼebé la’o husik hela erdeiru ne’ebé prevee ona iha artigu 27 nú. 1, husi estatutu Kombatente Libertasaun Nasionál.

Ministru Asuntu Kombatente Libertasaun Nasionál, Gil da Costa Monteiro “Oan Soru”, halo aprezentasaun proposta dekretu-lei ida ba Primeiru-Ministru kona-ba apoia finanseira ba família martir nary bainhira Prezidente Repúblika promulga bele halo preparasaun atribuisaun finansiamentu úniku ba benefisiáriu pensaun sobrevivénsia sira.

“Tanba pensaun sobrevivénsia ne’e labele duni enkuantu ita tau ba letra iha lei ne’e sala, ne’ebé daudaun ne’e ita preparasaun para atribui ba sira,” Ministru ne’e informa ba jornalista sira hafoin ramata reuniaun Konsellu Ministru iha Palásiu Governu, kuarta ne’e.

Nia dehan, proposta ohin ne’e aprova tiha ona nary hein de’it Prezidente Repúblika halo promulgasaun

Iha parte seluk, Ministru Prezidénsia Konsellu Ministru, Agio Pereira, afirma katak Konsellu Ministru aprova dekretu-lei ida hodi fó apoiu finanseiru dala ida de’it ba familia martir libertasaun nasionál ninian.

Objetivu dekretu-lei ida-ne’e atu rekoñese nary fó valór ba sakrifísiu eroi libertasaun nasionál nary mós hanaran garantia justisa sosiál ba família sira-nian hodi bele kontinua sustenta sira-nia moris.

“Maneira atu hetan subsídiu ne’e tenke halo pedidu ba MAKLN ho kordenasaun ho konsellu kombatente rekerementu ne’ebé tenke entrega dokumentu ke presiza atu hetan subsídiu ne’e,” nia esplika.

Nia apela, atu hetan subsídiu ne’e karik tenke halo transferénsia bankária ba konta resipiente sira nian, maibé bainhira subsídiu ne’e kuandu simu ona ne’e labele akumula fali ho subsídiu seluk.

Bazeia ba dokumentu ofisiál ne’ebé Agênsia Tatoli asesu haktuir, diploma ne’e estabelese montante benefísiu nian ho $10.000, atu fó ba inan-aman sira ka, bainhira sira laiha, ba maun-alin sira husi Martir sira Libertasaun Nasionál nian, ho objetivu mak atu rekoñese nary valoriza sakrifísiu husi sira-ne’ebé fó sira-nia moris ba independénsia Timor-Leste, hodi garante justisa sosiál ba sira-nia membru família besik ne’ebé esklui husi pensaun ne’ebé prevee iha Estatutu Kombatente nian.

Enkuantu pedidu ba apoiu tenke aprezenta formalmente ba Ministériu Asuntu Kombatente Libertasaun Nasionál, iha koordenasaun ho Konsellu Kombatente Libertasaun Nasionál, hodi hatama pedidu nary dokumentasaun ne’ebé presiza. Pagamentu sei halo liuhusi transferénsia bankária diretamente ba konta benefisiáriu nian.

Apoiu finanseiru dala ida de’it ne’e labele tau hamutuk ho pensaun sira seluk ne’ebé atribui tuir Estatutu Kombatente Libertasaun Nasionál, nary karik iha benefisiáriu liu ida, montante ne’e sei fahe hanesan.

Jornalista : Alexandra da Costa

Editór        : Cancio Ximenes