KKM sujere estabelese ramu universidade no biblioteka iha Vikeke

VIKEKE, 15 Setembru  2025 (TATOLI) – Membru Konsellu Konsultivu Munisipál husu Prezidente Autoridade Munisípiu (PAM) Vikeke atu buka dalan hodi loke universidade iha munisípiu, atu estudante sira labele halai bá Dili.

Membru Konsellu Konsultivu Munisipál Vikeke, Jacinto Baptista, hateten, atu tama desentralizasaun nary podér lokál mak presiza haree polítika edukasaun liliu loke universidade ruma iha Vikeke.

“Tanba ohin loron ita-nia juventude sira sai husi munisípiu tenke ba Dili hodi asesu ba universidade. Atu satan ita-nia juventude sira  labele bá Dili, autoridade tenke koordena universidade sira iha Dili  mai loke fali universidade paralelu  iha Vikeke. Se la’e ita-nia joven sira tenke ba Dili nafatin,” Jacinto Baptista, hato’o asuntu ne’e iha enkontru Konsellu Konsultivu Munisipál, segunda ne’e.

Jacinto akresenta daudaun ne’e, Governu Sentrál halo despezu administrativu iha Dili. Ida-ne’e autoridade presiza kria polítika hodi satán juventude bá Dili.

“Ha’u sujere estabelese universidade paralelu nary loke mós bibileoteka ida iha Vikeke hodi hariiku ema-nia kakutak liga ba dezenvolvimentu sira iha munisípiu,” nia fó hanoin.

Notísia relevante: https://tatoli.tl/2024/04/02/tinan-nee-seak-promete-konstroi-biblioteka-nasional/

 Hatán ba asuntu ne’e Prezidente Autoridade Munisípiu Vikeke,  Francisco C.S de Gonzaga Soares, hateten ida-ne’e sai preokupasaun munisípiu nian.

“Tan ne’e, ita sei halo koordenasaun ba universidade sira-nia paralelu iha Vikeke, atu joven sira labele hanoin konsentrasaun iha Dili. Iha tempu-badak ita sei tuur hamutuk ho organizasaun sira buka solusaun ba polítika edukasaun. Ha’u agradese ba preokupasun sira-ne’e,”  Autoridade ne’e akresenta.

Nia rekorda, Universidade João Marianho Saldanha mós hakarak loke ninia universidade paralelu iha suku Vessoru, Postu Uatulari nary Universidade da Paz (UNPAZ) mós halo ona aprosimasaun ho parte autoridade munisípiu Vikeke.

Notísia relevante: https://tatoli.tl/2022/07/04/unpaz-sei-kompleta-rekezitu-atu-hetan-lisensa-operasional-ba-klase-paralela/

Jornalista: Vitorino Lopez da Costa

Editór: Rafael Ximenes de A. Belo