.png)
6 months ago
7
BOBONARU, 04 Setembru 2025 (TATOLI)—Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI, I.P.) Brigada Maria-Tapo, daudaun ne’e halo hela normalizasaun estrada diresaun husi área Mau-Mali, Suku Ritabou bá Postu Administrativu Kailaku, Munisípiu Bobonaru to’o área Bilimau, Postu Administrativu Hatulia, Munisípiu Ermera.
Intervensaun emerjénsia ne’e hahú semana kotuk liubá nary daudaun ne’e to’o ona iha área Mautalo.
“Ha’u hamutuk ho komunidade Kailaku sente kontente ho IGEADI ne’ebé mak apoia ona estrada husi Mau-Mali ba to’o Bilimau,” Administradór Postu Administrativu Kailaku, Rodolfo da Cruz informa ba jornalista sira iha Maliana, Kinta ne’e.
Autoridade postu Kailaku ne’e konsidera intervensaun ne’e bele fasilita ona movimentasaun públiku liuliu komunidade atu lori produtu lokál asesu bá merkadu.
“Maski taka de’it ko’ak, maibé la difikulta ona ita-nia transporte públiku,” Rodolfo haktuir.
Nia solisita instituisaun releventa atu aselera prosesu konkursu estrada nune’e bele implementa iha tempu badak, tanba povu Kailaku hein obra ne’e durante tinan barak ona.
Nia hatutan katak bainhira projetu ne’e implementadu ona, autoridade postu hamutuk ho líder komunitáriu, intelektuál sira sei koopera ho empreza konstrutora hodi asegura obra ne’e la’o sein impedimentu.
Entretantu, abitante Roberto Afonso de Jesus apresia nary tau esperansa ba Governu atu prioriza estrada ne’e iha planu orsamentu 2026.
“Ami-nia hakarak ne’e tarde liu tinan oin ne’e tenke halo ona, tanba ami povu Kailaku tinan 20-resin ona halerik ba estrada, udan mai sai araska, estrada laran bee-nakonu hanesan mota, ita asesu ladi’ak. Só hein to’o udan para bee menus tiha mak bele liu,” nia tenik.
Enkuantu, reabilitasaun estrada nasionál iha seksaun entre kapitál Maliana bá Postu Administrativu Kailaku nary Ponte Marobo ho naruk kilómetru 26 nary kustu ne’ebé prevee hamutuk millaun $25,6.
Jornalista: Sergio da Cruz
Editór: Xisto Freitas da Piedade
/data/photo/2025/08/25/68abe52811277.jpeg)
