HNGV relata bebé 84 mate iha inan nia kabun laran

SAÚDE

Ilustrasaun bebé mate iha inan nia kabun laran. Imajen/Espesiál.

DILI, 19 Setembru 2025 (TATOLI)—Xefe Interina Maternidade Hospitál Nasionál Guido Valadares (HNGV), Maria Franco da Silva, relata husi Abríl to’o Agostu 2025 ne’e, bebé ne’ebé mate iha inan nia kabun laran hamutuk 84 tanba komplikasaun.

“Kazu ne’e barak mak transferénsia husi munisípiu sira inklui iha Dili,” Maria Franco da Silva informa ba jornalista sira iha nia kna’ar fatin HNGV, Bidau, ohin.

Bebé sira-ne’ebé mak mate iha inan nia kabun laran ne’e tanba iha tempu inan isin-rua lahalo tratamentu didi’ak nary mai fasilidade saúde tarde mak halo infeksaun hodi halo bebé mate iha inan nia kabun laran.

“Husi Abril to’o Agostu ne’e, totál inan ne’ebé mak baixa iha sala maternidade HNGV hamutuk  2.906. Husi númeru ne’e bebé ne’ebé mak moris hamutuk 3.035. Husi ida-ne’e partus normál 1.817, partus cesariana 857, vakun ka uza ekipamentu mak dada sai hamutuk 200 nary bebé ne’ebé mak moris ho kidun mak uluk hamutk 77,” nia esplika.

Inan sira-ne’ebé mak partus iha ne’e einjeral kondisaun di’ak hotu, entaun iha ne’e dalabarak kazu komplikadu nary mós inan sira ho tensaun balun ho raan fakar sira-ne’e mak halo opera.

“Dalabarak kazu sira ho moris prematura ne’e dahuluk mak inan sira-ne’ebé mak ho koñesementu menus kona-ba saúde. Daruak, mak antes ne’e sira iha infeksaun ne’ebé mak hanesan raan-mutin ka infeksaun mii, ne’ebé mak mak la halo tratamentu iha fasilidade saúde atu kontrola mak ida-ne’e kontribui partus sedu. Tanba ne’e, mak dalabarak pesoál saúde sira fó  promosaun edukasaun saúde ba sira  katak  hahú isin-rua, dahuluk tenke tuir Anti Natal Care (ANC) nune’e bebé moris ho di’ak,” nia dehan.

Jornalista : Felicidade Ximenes

Editór        : Cancio Ximenes