Governu kontrata ona empreza rua reabilita estrada Luka liga bá postu Lakluta

MUNISÍPIU, VIKEKE

Ekipa tékniku MOP finaliza ona dezeñu estrada husi Luka bá Lakluta. Imajen Tatoli/Vitorino. Lopes da Costa

VIKEKE, 15 Setembru  2025 (TATOLI) –Xefe suku Dilór, postu Lakluta, munisípiu Vikeke, Jacinto Ximenes, informa, IX Governu konstituisionál halo ona kontratu ba empreza rua Hoven II unipessoal Lda,  no  empreza Kimberlie Konstrusaun Unipessoal Lda mak   halo reabilitasaun estrada husi Luka liga postu administrativu Lakluta.

 “Foin lalais Sesta (13/09) semana kotuk ne’e  empreza rua lori ona sira-nia karta koñesementu projetu ba ha’u, tanba empreza sira hetan kontratu husi IX Governu liuhusi Ministériu Obra Públika (MOP) atu  halo reabilitasaun estrada husi suku Luka, postu Vikeke Vila,  liga bá postu Lakluta. Nune’e daudauk ne’e karta rekoñesemetu iha ona ami,”   Jacinto Ximenes, ba Tatoli, iha postu Lakluta, ohin.

Autoridade komunitária ne’e hatutan, daudauk ne’e empreza rua ne’ebé responsavel ba reabilita estrada Luka liga postu Lakluta destaka ona sira-nia ekipamentu pezadu, halo hela servisu  limpeza ba estrada sira iha Lakluta. Alende ne’e,  empreza rua   prepara ona sira-nia armazen hodi rai sira-nia ekipamentu.

“Reabilitasaun estrada husi Luka ba postu Lakluta ne’ebé hetan aprovasaun purvolta  kilométru 14, orsamentu ba reabilitasaun ne’e empreza seidauk fó hatene ami, sira dehan depois halo lansamentu mak foin fó sai montante orsamentu ba públiku. Kona-ba lansamentu estrada ne’e iha loron 02 fulan-Outubru  2025 ami autoridade postu Lakluta  hamutuk ho xefe suku Luka sei enkontru preaprasaun ba seremónia lansamentu estrada nian,”  nia relata.

Tuir nia,  lansamentu ba reabilitiasaun estrada husi Luka bá postu Lakluta  Primeiru-Ministru (PM) Kay Rala Xanana Gusmão mak sei halo lansamentu direta tanba ne’e autoridade sira sei forma  komisaun organizadora ba  lansamentu hafoin fó sai loron  lansamentu nian.

“Durante ne’e, ami povu Lakluta preokupa tebes ba estrada ne’e, maibé governu fó ona resposta ba ami-nia halerik. Nune’e obra ne’e implementa ami servisu hamutuk ho empreza sira hodi asegura servisu to’o obra ne’e  konkluídu”, nia garante.

Líder komuniráriu ne’e espera, bainhira estrada referida empreza rua konkluídu, sira servisu sei benefísia ba povu Lakluta ne’ebé durante ne’e enfrenta ba estrada diresaun Luka ba postu administrativu Lakluta.

Kona-ba reabilitasaun estrada husi Luka Raihun to’o suku Dilór postu Lakluta,  MOP fó kontratu empreza rua mak hanesan  númeru; SSS/136/MOP-2025 ba empreza Hoven II unip Lda sei ezeketa Luka, Raihun to’o Dilór Sta.7+000-13+922.67 km. Enkuantu, MOP kontratu númeru; SSS/135/MOP-2025  ho empreza Kimberlie Konstrusaun Unipessoal Lda Sta.0+000-7+000 km.

Notisia relevante: https://tatoli.tl/2025/09/03/autoridade-husu-mop-implementa-reabilitasaun-estrada-kilometru-22-ba-postu-lakluta/

Jornalista :Vitorino Lopes da Costa

Editór       : Rafael Ximenes de A. Belo