ESTV Ravina Lakluta menus profesór

EDUKASAUN, HEADLINE, VIKEKE

Ensinu Sekundáriu Tékniku Vokasionál (ESTV) Ravina, Postu Administrativu Lakluta, Munisípiu Vikeke. Imajen TATOLI/ Vitorino Lopez da Costa

VIKEKE, 22  Setembru  2025 (TATOLI)—Diretór Ensinu Sekundáriu Tékniku Vokasionál (ESTV) Ravina, Postu Administrativu Lakluta, Munisípiu Vikeke, Rosito  Soares Morais informa daudaun ne’e ESTV Ravina Lakluta enfrenta menus profesór hodi hanorin estudante sira.

“Problema ne’ebé agora daudaun ami enfrenta mak menus profesór, dixiplina matéria hamutuk 15, maibé profesór na’in-sanulu (10) de’it mak kobre hotu matéria sira-ne’e. Profesór ida bele lori matéria tolu. Tuir kurríkulu ne’e profesór na’in-ida lori dixipiña ida, maibé ami menus profesór. Ami pasiénsia fahe dixiplina ba malu hodi prenxe dixiplina ne’ebé profesór laiha, atu hanorin ita-nia estudante sira,” Rosito  Soares Morais ba TATOLI iha  Postu Lakluta, Segunda ne’e.

Kona-ba menus profesór ne’e, Diretór ESTV Ravina Lakluta relata ona ba Preziente Autoridade Munisípiu (PAM) Vikeke, Servisu Eduksaun Munisípiu nary Ministériu Edukasaun (ME), maibé to’o agora seidauk koloka profesór ruma hodi kompleta manorin sira iha ESTV Ravina.

“Ami-nia preokupasaun sira-ne’e ami hato’o hotu ona ba parte relevante sira-ne’e, más to’o agora seidauk koloka profesór mai. Tan ne’e, ami kontinua husu ME hodi koloka profesór ba ESTV Ravina Lakluta atu hanorin estudante sira,” nia sujere.

Nia informa, sira presiza profesór na’in-sanulu hodi kompleta manorin sira-ne’e  tanba sira iha planu tinan oin (2026) atu loke tan departamentu Informasaun Teknólojia (IT).

“Departamentu IT ne’e estudante Lakluta presiza tebes. Tanba ne’e mak ami husu atu harii tan departamentu foun IT hodi estudante Postu Lakluta bele asesu ba departamentu referidu,” Rosito tenik.

Tuir dadus, estudante ESTV Ravina Lakluta husi klase 1 to’o klase 3  totál hamutuk na’in-96 nary profesór na’in-sanulu ne’ebé daudaun ne’e ativu hanorin estudante sira.

Jornalista: Vitorino Lopez da Costa

Editór: Xisto Freitas da Piedade