DNTT Vikeke instala sinál tránzitu iha Lugatoi evita asidente tráfegu

HEADLINE, VIKEKE

DNTT Vikeke instala sinál tranzitu iha Estrada Lugatoi. Imajen TATOLI/Vitorino Lopez da Costa

VIKEKE, 05 Setembru  2025 (TATOLI)—Diretór Diresaun Nasionál Transporte Terrestre (DNTT) Munisípiu Vikeke, Saul Henrique hateten DNTT Vikeke hahú instala sinál tránzitu iha área Lugatoi, Suku Karaubalu, Postu Vikeke Vila, atu evita asidente tráfegu.

“Kona-ba sinál tránzitu ne’ebé agora ami tau iha área Lugatoi ne’e, orientasaun husi Prezidente Autoridade Munisipál Vikeke (PAM), atu evita asidente tráfegu.  Tanba ne’e, ami monta sinál tránzitu hamutuk haat iha área ne’ebá,” Saul Henrique ba TATOLI, iha Postu Administrativu Vikeke Vila, Sesta ne’e.

Saul hatutan sinál tránzitu rua iha parte Lugatoi karpintáriu nian ne’e, DNTT tau provizóriu atu bandu karreta footwear sira labele liu husi iha área Lugatoi, maibé aban-bainrua estrada di’ak, DNTT sei foti filafali sinál referidu.

“Tanba, antes ne’e, asidente ne’ebé akontese iha área Lugatoi ne’e, karreta tolu mak baku fila iha ne’ebá. Ho ida-ne’e, PAM orienta katak estrada karreta ki’ik nary motorizada mak liuhusi Lugatoi, maibé ba karreta footwear sira liuhusi mota laran. Enkuantu, sinál tránzitu obrigatóriu ne’ebé ami tau iha abastesimentu Lugatoi parte iha ponte rua nian permanente, atu transporte sira uza hotu ponte ne’e,” nia haktuir.

Nune’e, nia tenik, sinál tránzitu ne’e sei fó tempu semana rua, maibé liu ida-ne’e DNTT sei fó karta ba unidade tránzitu hodi haree atu ema labele viola sinál tránzitu ne’ebé parte DNTT instaladu iha área referida.

Notísia relevante: https://tatoli.tl/2025/02/27/dntt-vikeke-identifika-tinta-pinta-zebra-cross-moos-difikulta-ema-lao-ain-ultrapasa/

“Ohin públiku kestiona ami dehan estrada seidauk di’ak, maibé ami tau ona sinál. Agora, ligadu ho estrada  la’ós ami-nia kompeténsia. Ami tau sinál tránzitu ne’e bazeia ba oirentasaun ne’ebé mai iha autoridade munisípiu, ne’ebé ami kumpre de’it,” nia informa.

Aleinde ne’e, nia dehan, kona-ba sinál pasadeira (zebra cross) ne’ebé iha kapitál Vikeke laran, balun la eziste ona. Nune’e, DNTT halo ona pedidu ba nasionál, maibé seidauk iha resposta.

“Ita-nia sinál tránzitu liuliu ba zebra cross sira-ne’ebé agora lakon daudaun ona, hanesan iha parte eskola CAFE, igreja nary fatin sira seluk ne’e, ami halo ona pedidu ba nasionál, maibé seidauk iha resposta. Resposta iha ona karik ami implementa ona tanba zebra cross importante ba ema la’o-ain atu ultrapasa estrada,” nia tenik.

Entretantu, iha kapitál Vikeke daudaun ne’e, parte DNTT Munisípiu Vikeke instala sinál foun hamutuk haat. Husi sinál tránzitu sira-ne’e lokalizadu hotu iha área Lugatoi.

Jornalista: Vitorino Lopez da Costa

Editór: Xisto Freitas da Piedade