Autoridade Uatulari hahú sosializa Dekretu-lei Ijiene Orden Públika ba suku  sira

LEI, MUNISÍPIU, VIKEKE

Balada ne’ebé husik livre iha espasu públiku iha Uatulari. Imajen TATOLI/Vitorino Lopez da Costa

VIKEKE, 03 Setembru  2025 (TATOLI)—Autoridade Postu Administrativu Uatulari, Munisípiu Vikeke, hahú sosializa Dekretu-lei Nú: 3/2024 kon-ba Ijiene Orden Públika ba komunidade atu labele husik livre balada sira.   

Reprezentante Administradór Postu Uatulari atuál Xefe Departamentu Planeiamentu, João Lemos hateten Autoridade Postu Uatulari forma ona ekipa task force hodi tama sai suku halo sosializasaun ba Dekretu-lei Ijiene Orden Públika ba komunidade sira iha suku ualu (8) iha Postu Uatulari atu komunidade bele komprende lei sira-ne’e hodi labele husik livre balada sira.

“Kona-ba karta sirkulár ne’ebé ita-nia Prezidente Autoridade Munisípiu Vikeke lansa iha fulan-Juñu ne’e, Postu Uatulari ami foin halo sosializasaun ba ita-nia komunidade atu sira bele hatene dekretu-lei ne’e,” João Lemos hateten ba TATOLI iha Postu Uatulari, Kuarta ne’e.

Nia haktuir sosializasaun ne’ebé postu realiza konklui ona iha suku lima hanesan Uaitame, Makadike de Cima, Makadike de Baixo, Babulu, Vessoru nary suku tolu ne’ebé seidauk mak hanesan Suku Afaloikai, Makadike Uaitame nary Matahoi.

Notísia relevante: https://tatoli.tl/2025/06/20/autoridade-vikeke-lansa-sirkular-bandu-animal-husik-livre-iha-espasu-publiku/

João hatutan bainhira sosializasaun ramata fó tan tempu ba komunidade kuidadu sira-nia balada sira labele husik livre, maibé liu tempu  ne’ebé autoridade fó mak komunidade la kumpri, ekipa sei foti medida ba balada sira-ne’ebé husik livre.

“Durante ami hala’o sosializasun iha kada suku sira, ita-nia komunidade promete katak prontu kumpri dekretu-lei  ne’e,” nia haktuir.

Entretantu, ekipa konjuta ne’ebé Autoridade Uatulari forma ne’e hamutuk rua. Ekipa ida husi postu ne’ebé  kompostu husi liña ministeriál  iha Postu Uatulari  inklui Polísia Nasionál Timor-Leste (PNTL) Eskuadra Uatulari. Ekipa ida seluk husi  suku  kompostu husi xefe suku, xefe aldeia nary KPK. Ekipa sira-ne’e mak sei kontrola balada sira-ne’ebé husik livre.

Jornalista: Vitorino Lopez da Costa

Editór: Xisto Freitas da Piedade