Autoridade husu MOP implementa reabilitasaun estrada kilómetru 22 ba Postu Lakluta

MUNISÍPIU, VIKEKE

strada ba diresaun Postu Lakluta. Imajen TATOLI/Vitorino Lopez da Costa

VIKEKE, 03 Setembru  2025 (TATOLI)—Xefe Suku Ahik, Postu Administrativu Lakluta, Munisípiu Vikeke, Ercílio Soares husu Ministériu Obra Públika (MOP) implementa ona projetu reabilitasaun estrada kilómetru 22 liga bá Postu Administrativu Lakluta hodi povu asesu.

“Uluk ekipa MOP iha Munisípiu Vikeke ko’alia ba ami ne’e dehan dezeñu ramata ona, maibé to’o agora ami la rona loos tiha ona novidade. Tanba ne’e, ha’u husu liuliu MOP atu implementa ona projetu reabilitasaun estrada  kilómetru 22 husi Suku Luka ba Postu Lakluta atu povu Lakluta bele asesu,” Ercílio Soares hateten ba TATOLI iha Postu Lakluta, Kuarta ne’e.

 Notísia relevante: https://tatoli.tl/2025/05/13/mop-finaliza-ona-dezenu-estrada-husi-luka-ba-lakluta/

Autoridade ne’e haktuir fulan hirak liubá MOP rasik promete iha salaun Munisipál Vikeke katak estrada ba Postu Lakluta dezeñada, depoiz konkursu sai estrada ba Lakluta kilómetru 22 ne’e laiha fali.

“MOP dehan tempu badak implementa, maibé to’o agora laiha. Ita  lahatene loos povu Lakluta ne’e Estadu haree ka la haree karik. Tanba ne’e mak ami-nia estrada liga mai ami-nia postu aat tinan ba tinan nune’e hela,” nia haktuir.

Nia hatutan kondisaun estrada liga bá Postu Lakluta autoridade sira hato’o beibeik ba Governu nary mídia mós fó-sai beibeik maibé seiduak iha desizaun ruma.

Tuir Ercílio katak kondisaun estrada aat difikulta ekonomia tanba tempu udan negosiante sira labele lori sira-nia produtu lokál asesu bá merkadu, tanba ne’e Governu presiza hadi’a estrada hodi povu buka sira-nia moris.

Jornalista: Vitorino Lopez da Costa

Editór: Xisto Freitas da Piedade