Autoridade hato’o pedidu ba IGTL halo levantamentu ba  bee-moos iha Uma-Ki’ik

MUNISÍPIU, VIKEKE

Xefe Suku Uma-Ki’ik, Postu Administrativu Vikeke, Munisípiu Vikeke, Cláudio Amaral. Imajen TATOLI/Vitorino Lopez da Costa

VIKEKE, 02 Setembru 2025 (TATOLI)—Xefe Suku Uma-Ki’ik, Postu Administrativu Vikeke, Munisípiu Vikeke, Cláudio Amaral halo pedidu ba Institutu Jeofízika Timor-Leste (IGTL-sigla ingleza) hodi halo levantamentu bee-moos iha rai okos iha área Suku Uma-Ki’ik.

“Iha semana kotuk ha’u lori ona pedidu ba IGTL atu hao levantamentu bee-moos iha ami-nia Suku Uma Ki’ik. Tanba ne’e, IGTL iha ekipamentu ne’ebé bele koko bee sira-ne’ebé iha rai okos. Tan ne’e, ekipa IGTL sei mai halo levantamentu,” Cláudio Amaral hateten ba TATOLI iha postu Vikeke, Tersa ne’e.

Nia hateten bainhira ekipa IGTL halo tiha levantamentu hetan ona bee-moos, hafoin bolu ekipa perfurasaun Xinés hodi kontinua halo perfurasaun ba komunidade Suku Uma-Ki’ik.

“Antes ne’e, tékniku husi Provínsia Hunan, Xina, halo ona perfurasaun maibé la hetan bee-moos to’o sira retira tiha nary ekipamentu perfurasaun daudaun ne’e sei rai hela iha suku. Tanba ne’e, ha’u inisiativa lori pedidu bá IGTL hodi ajuda ami halo levantamentu,” nia haktuir.

Notísia relevante: Perfurasaun iha Suku Uma-Ki’ik la hetan bee-moos

Nia dehan kuaze tinan barak komunidade Suku Uma-Ki’ik enfrenta difikuldade ba bee-moos. Daudaun ne’e komunidade maioria depende konsume bee husi mota. Tempu udan mota tun, komunidade lebele kuru bee husi mota.

“Tanba ne’e, nu’udár autoridade ami esforsu hodi buka solusaun ba problema bee-moos ne’ebé durante ne’e ami hasoru,” Cláudio haktuir.

Tuir dadus, Suku Uma-Ki’ik iha uma-kain hamutuk 801, populasaun na’in-3.715. Husi númeru ne’e, populasaun 98% asesu ba bee-mota nary 2% asesu ba bee-posu ne’ebé komunidade ke’e rasik.

Suku Uma Ki’ik kompostu hosi aldeia ualu hanesan Rai-Hun ho uma-kain 54 nary populasaun na’‘in-240, Makadean uma-kain 100 nary populasaun na‘in-478, Bahabunak uma-kain 103 nary populasaun na‘in-457, Lua uma-kain 239 nary populasaun na’in-1226, Baha Fou uma-kain 62 nary populasaun na’in-307, Aina Ua’in uma-kain 58 nary populasaun naiin-252, Maroman uma-kain 70 nary populasaun na’in-309 nary Idak Bein uma-kain 101 nary populasaun na’in-444.

Jornalista: Vitorino Lopez da Costa

Editór: Xisto Freitas da Piedade