AMB entrega dezeñu merkadu Ilibole ba negosiante sira

BOBONARU, HEADLINE

Autoridade Munisípiu Bobonaru entrega dezeñu mini Merkadu Ilibole ba negosiante sira atu konstrui rasik fatin negósiu. Foto Tatoli/Sergio da Cruz

BOBONARU,05 setembru 2025 (TATOLI) – Autoridade Munisipál Bobonaru (AMB), liuhusi Xefe Departamentu Jestaun Merkadu, Ernesto de Oliveira, nary Administradór Postu Administrativu Maliana, Agusto Caetano, entrega dezeñu mini-merkadu Ilibole ba negosiante sira atu konstrui rasik kioske nary uma fa’an modo nian.

Ernesto de Oliveira Barreto hateten dezeñu ne’e mai ho totál uma unidade 63, ne’ebé kada ho medida 3×4 nary dezeñu fahe ba parte estrada kraik ba negosiante sira halo kioske no estrada leten ba fa’an modo nary ai-fuan nian.

“Ami entrega dezeñu ba imi-nia liman, idaidak halo ba, dada-tali oan halo forma de’it ne’e para ema hare di’ak uitoan. Husu imi halo tuir dezeñu para hotu-hotu hetan fatin. Sé mak la halo tuir dezeñu ne’e ami sei mai sobu, tanba ema hotu iha direitu hanesan”, antigu Prezidente Autoridade Bobonaro hato’o ne’e durante konversa ho negosiante sira

Biban ne’e, Administradór Postu Administrativu Maliana, Agusto Caetano, reforsa katak autoridade Bobonaru hili ona responsavel na’in-tolu  ho voluntariamente organiza negosiante sira harii fatin negósiu tuir dezeñu.

“Imi halo la tuir dezeñu hau sei sobu, ne’ebé provizóriu imi hela lai ho ida ne’e. Ha’u ho cefe suku sira luta para tau iha Programa Planu Dezembolvimentu Integradu Munisipál (PDIM) para halo fatin foun ba imi, más ha’u la promete ida, ita hotu hein de’it”, nia salienta.

Caetano afirma Governu mós planeia atu rekruta funsionáriu ida hodi tau-matan ba merkadu ne’e.

“Imi fa’an sasán iha ne’e labele so’e lixu arbiru, labele so’e iha bee-matan Ilibole tanba fatin ne’e ita sei halo lutu haleu hodi konserva hanesan ita-nia patrimóniu kulturál”, dehan.

Negosiante Elsa Sose Mau prontu halo uma tuir dezeñu ne’ebé preparadu nary husu autoridade munisipál atu kontinua halo planu ida di’ak hodi kria kondisaun ne’ebé dignu.

“Ami halo rasik ne’e uza ami-nia forsa. Se ami forsa la to’o, halo ladún di’ak nary uza la kle’ur udan ho anin mai aat filafali, entaun ita-nia Governu mak halo para di’ak nian, ami bele uza kle’ur”, dehan.

Vendedór sira ne’ebé daudaun iha merkadu Ilibole mai husi suku Raifun nary Odomau, Postu Administrativu Maliana nary suku Oe-leu, Postu Administrativu Bobonaru.

Jornalista: Sergio da Cruz
Editora: Maria Auxiliadora