Ahi han uma iha Afaloikai, sasán uma laran  la salvadu

MUNISÍPIU, VIKEKE

Inséndiu iha Suku Afalokai, sasán uma laran  la salvadu. Imajen espesiál

VIKEKE, 29 Agostu 2025 (TATOLI)—Akontesimentu ahin han uma ida iha área Aekiri, Aldeia Ossokaiua, Suku Afaloikai, Postu Administrativu Uatulari, Munisípiu Vikeke, akontesimentu sasán uma laran la salvadu.

Uma-na’in Francisco Amaral haktuir akontesimentu inséndiu ahi han uma ne’e akontese iha Kuarta (28/08) maizumenus  tuku 12h00. Bainhira akontese inséndiu ne’e, família sira bá hotu natar.

“Akontesimentu ne’e ami iha hotu natar, tan ne’e ahi han uma ami labele salva ami-nia sasán sira-ne’ebé rai iha uma laran.  Tan ne’e, ami sente triste tanba ami-nia sasán ahi han hotu,” Francisco Amaral ba TATOLI iha Postu Uatulari, Sesta ne’e.

Nia relata sasán sira-ne’ebé ahi han mak hanesan osan montante hamutuk $2.000, dokumentu hanesan Billeti Identidade (BI), kartaun eleitorál, roupa nary sasán sira seluk.

“Agora daudaun ami hela provizoriamente ho família viziñu tanba ami-nia hela fatin ahi han moos. Akontesmentu ne’e ami relata ona ba ami-nia autoridade sira,” Francisco informa.

Tuir dadus, família hamutuk na’in-sanulu (10) mak hela iha uma ne’ebé ahi han ona ne’e.

Iha fatin hanesan, Xefe Aldeia Ossokaiua, Americo Soares hateten akontesimentu ne’e nia aprezenta ona ba Xefe Suku Afaloikai nary Autoridade Protesaun Sivíl.

“Akontesimentu ne’e loos. Ahi  han duni ha’u-nia abitante nia uma ida. Parte Autoridade  Protesaun Sivíl (APC-sigla portugeza) sei bá halo verifikasaun hodi buka hatene loloos kauza husi ne’ebé atubele hatene motivu husi ahi han uma,” nia tenik.

Jornalista: Vitorino Lopez da Costa

Editór: Xisto Freitas da Piedade